അമേരിക്കയ്ക്കും യൂറോപ്പിനും വേണ്ടി ഐഫോൺ 18 പ്രൊ സീരീസ് ഇന്ത്യയിൽ നിർമിച്ചു തുടങ്ങി

ആപ്പിൾ കമ്പനി തങ്ങളുടെ ഏറ്റവും പുതിയ ഐഫോൺ 18 പ്രോ, പ്രോ മാക്സ് മോഡലുകളുടെ ഉത്പാദനം ഇന്ത്യയിൽ സജീവമായി ആരംഭിച്ചിരിക്കുകയാണ്. വരാനിരിക്കുന്ന സെപ്റ്റംബർ ലോഞ്ചിന് മുന്നോടിയായി അമേരിക്ക, യൂറോപ്പ് വിപണികളിലെ ആവശ്യകത മുൻകൂട്ടി കണ്ടാണ് ഫാക്ടറികളിൽ ഉത്പാദനം ആരംഭിക്കുന്നത്.

തമിഴ്‌നാട്ടിലും കർണാടകയിലുമായി പ്രവർത്തിക്കുന്ന ഫോക്സ്കോൺ, ടാറ്റ ഇലക്ട്രോണിക്സ് എന്നീ കമ്പനികളാണ് പ്രധാനമായും ഈ പ്രീമിയം ഫോണുകൾ നിർമ്മിക്കുന്നത്.

ആഗോള വിപണിയിലേക്കുള്ള ഫോണുകളുടെ ഭൂരിഭാഗം നിർമ്മാണവും ഫോക്സ്കോൺ തന്നെയാണ് കൈകാര്യം ചെയ്യുന്നതെങ്കിലും, ഇത്തവണ ടാറ്റ ഇലക്ട്രോണിക്സിന് വലിയ പങ്കാളിത്തം ലഭിച്ചിട്ടുണ്ട്. കഴിഞ്ഞ തവണ ലോഞ്ചിന് ശേഷം വളരെ വൈകിയാണ് ടാറ്റ പ്രോ മോഡലുകളുടെ നിർമ്മാണം തുടങ്ങിയതെങ്കിൽ, ഇത്തവണ തുടക്കം മുതൽ തന്നെ പ്രോ സീരീസ് നിർമ്മിക്കാൻ അവർക്ക് ഓർഡറുകൾ ലഭിച്ചു.

കൗണ്ടർപോയിന്റ് റിസർച്ചിന്റെ കണക്കുകൾ പ്രകാരം, 2026-ഓടെ ആഗോള ഐഫോൺ ഉത്പാദനത്തിന്റെ 26 ശതമാനവും ഇന്ത്യയിലായിരിക്കും. വിദേശ വിപണികളിലേക്ക് ഇന്ത്യയിൽ നിന്നുള്ള സ്മാർട്ട്‌ഫോൺ കയറ്റുമതിയിൽ വലിയ വർദ്ധനവാണ് രേഖപ്പെടുത്തുന്നത്.

അതേസമയം, ആപ്പിൾ ആദ്യമായി പുറത്തിറക്കാൻ പോകുന്ന മടക്കാവുന്ന ഫോണായ 'ഐഫോൺ അൾട്രാ' പ്രാരംഭ ഘട്ടത്തിൽ ഇന്ത്യയിൽ നിർമ്മിക്കാൻ സാധ്യതയില്ലെന്നാണ് സൂചനകൾ. പുതിയ സാങ്കേതികവിദ്യ കൈകാര്യം ചെയ്യുന്നതിലെ വൈദഗ്ധ്യം ആവശ്യമായതിനാലാണ് ഈ തീരുമാനം.

വർദ്ധിച്ചുവരുന്ന ഘടകഭാഗങ്ങളുടെ വിലയും കറൻസി വ്യതിയാനങ്ങളും കാരണം പുതിയ ഐഫോണുകൾ പുറത്തിറങ്ങുമ്പോൾ ഇന്ത്യയിൽ ഇവയുടെ വിലയിൽ മാറ്റമുണ്ടാകാനും സാധ്യതയുണ്ട്.

Content Highlights:

Apple has started manufacturing iPhone 18 Pro and iPhone 18 Pro Max models in India. Production is focused on meeting demand from the US and European markets ahead of the September launch. Foxconn and Tata Electronics are handling premium iPhone manufacturing in Tamil Nadu and Karnataka. India is expected to contribute 26% of global iPhone production by 2026. Apple’s first foldable iPhone may not be manufactured in India initially. Rising component costs and currency fluctuations may impact iPhone prices.